Agger: Barcelona er eina félagið sem freistar mín

Danski landsliðsmiðvörðurinn Daniel Agger er enn leikmaður Liverpool þrátt fyrir tilboð frá Englandsmeisturum Manchester City og hann segist ekki spenntur fyrir neinu öðru félagi íensku úrvalsdeildinni. Daninn viðurkennir samt að Barcelona væri áhugaverður möguleiki fyrir sig í framtíðinni.

Daniel Agger segir það vera heiður fyrir sig að spila með félagi eins og Liverpool en hvað ef Barcelona bankaði á dyrnar? „Það væri frábært að fara til Barcaelona. Það er eina félagið sem myndi gera það erfitt fyrir mig að vera hér áfram," sagði Daniel Agger á blaðamannafundi.

„Ég hef alltaf litið á það sem heiður að spila fyrir félag eins og Liverpool. Sú tilfinning hefur orðið enn sterkari eftir að hafa fundið allan stuðninginn frá fólki þrátt fyrir að hlutirnir hafi ekki alveg gengið upp hjá okkur á síðustu árum," sagði Agger sem býst við titlum á Anfield í framtíðinni

„Það þekkja allir Liverpool-liðið frá níunda áratugnum sem vann titla á hverju ári en mér finnst við ekki vera langt frá því að fara gera hið sama. Ef ég hefði það ekki á tilfinningunni þá væri ég ekki hérna áfram. Þetta er einstakt félag," sagði Agger.

„Ég skil samt stöðu leikmanna eins og Luka Modric eða Robin van Persie, Ferillinn er stuttur og þú vilt bæði vinna titla og safna pening. Ég veit samt að það eru góðir hlutir sem bíða Liverpool handan við hornið," sagði Agger.