Töluverð aukning á opinberum aftökum í heiminum

Töluverð aukning varð á skráðum opinberum aftökum í heiminum á síðasta ári miðað við árið áður.

Þetta kemur fram í nýrri skýrslu frá Amnesty International. Að minnsta kosti 676 manns voru teknir af lífi opinberlega á síðasta ári og er það fjölgun um 149 manns frá árinu á undan.

Það er einkum í Miðausturlöndum sem aftökum hefur fjölgað, og þá einkum í Saudi Arabíu og Íran. Þessum aftökum fjölgaði einnig í Jemen og Írak. Í þessum fjórum löndum fjölgaði opinberum aftökum um 50% milli ára. Ekki fást tölur um aftökur í Kína en þær eru taldar nema þúsundum árlega.

Amnesty hefur áhyggjur af þessari þróun og vill að dauðrefsing verði lögð af allsstaðar í heiminum.