Villas-Boas: Ekkert ósætti á milli mín og Lampard

Andre Villas-Boas, stjóri Chelsea, segir að það sé rangt sem haldið hefur verið fram í fjölmiðlum að stirt sé á milli hans og miðvallarleikmannsins Frank Lampard.

Lampard sagði þó í síðustu viku að samband þeirra væri ekki „ákjósanlegt" en Lampard hefur mátt sætta sig við það oft á tímabilinu að sitja á varamannabekknum.

„Hvað mig varðar eru engin vandamál á milli okkar. Þetta er bara dæmigert samband á milli leikmanns og knattspyrnustjóra. Ummæli hans lýsa hans viðhorfi gagnvart okkar sambandi," sagði Villas-Boas.

„Það kemur í minn hlut að velja liðið og ég reyni að velja besta liðið fyrir hvern leik. Í nokkur skipti hefur Frank verið utan liðsins en það þýðir samt ekki að ég eigi eitthvað sökótt við hann."

„Þær ákvarðanir sem ég tek eru ávallt liðinu fyrir bestu."