Landsliðsþjálfari ekki ráðinn fyrr en undir lok tímabilsins

Enska knattspyrnusambandið ætlar að bíða þar til í lok tímabilsins í ensku úrvalsdeildinni með að ráða nýjan landsliðsþjálfara.

Harry Redknapp hefur helst verið orðaður við starfið eftir að Fabio Capello hætti í síðasta mánuði. Hann stendur hins vegar í ströngu með Tottenham þessa dagana.

Alex Horne, framkvæmdarstjóri enska sambandsins, segir að sambandið sé með ákveðna menn í huga en vilji ekki trufla félögin í deildinni.

„Við gerum okkur fyllilega grein fyrir því að margir á þessum lista eru í starfi hjá öðrum og viljum við ekki trufla neinn. Við ætlum að gefa okkur tíma og eigum von á því að ganga frá þessu í lok tímabilsins," sagði Horne við enska fjölmiðla.

EM byrjar í Póllandi og Úkraínu í júní og segir Horne að nýr þjálfari fengi nægan tíma til að undirbúa sig og liðið fyrir mótið. „Það eru allar áætlanir tilbúnar og ekkert sem skortir að því leyti."