Árásir gerðar víðsvegar um Írak

Að minnsta kosti 38 manns liggja í valnum eftir sprengjuárásir víðsvegar um Írak í morgun. Tvær bílsprengjur sprungu í borginni Kerbala, ein í Kirkuk, ein í Bagdad og fleiri árásir voru gerðar í smærri bæjum í landinu.

Svo virðist sem árásarmennirnir hafi samræmt aðgerðir sínar en sprengjurnar sprungu allar á svipuðum tíma. Talið er að árásunum sé ætlað að spilla fyrir leiðtogafundi Arababandalagsins sem halda á í höfuðborginni Bagdad í næstu viku.

Með fundinum stóð til að sýna hve ástandið hafi batnað mikið í landinu. Þá er bent á að í dag eru níu ár liðin frá því Bandaríkjamenn réðust inn í landið.