Skírði synina Barack Obama og Mitt Romney

Móðir frá Kenía í Afríku eignaðist tvíbura morguninn eftir að úrslit forsetakosninganna í Bandaríkjunum lágu fyrir. Þegar komið var að því að finna nöfn á litlu krílin var fátt annað sem kom upp í hugann á móðurinni en Barack Obama og Mitt Romney.

Millicent Owuor, sem er tvítug, sagði í samtali við héraðfréttablað í heimabæ sínum að hún hafi ákveðið að skíra drengina sína tvo nöfnunum því hún vildi ekki gleyma kosningunum.

Bærinn, sem konan býr í, er í næsta nágrenni við Kogelo, sem er einmitt bærinn sem faðir Barack Obama er jarðaður og margir ættingjar hans búa. Fylgst var náið með kosningunum í ár, líkt og árið 2008 þegar Obama var fyrst kjörinn sem forseti.