Snéri aftur eftir að eiginmaðurinn reisti náðhús

Nýgift kona í Indlandi hefur loks snúið heim eftir að hún krafðist þess að eiginmaður sinn kæmi fyrir klósetti á heimili þeirra.

Anita Narre og eiginmaður hennar, Shivram, höfðu aðeins verið gift í tvo daga áður en hún setti honum afarkostinn. Hún snéri heim að átta dögum liðnum en þá hafði Shivram komið fyrir klósetti á heimilinu.

Shivram eyddi öllu sparifé sínu og þurfti að biðja nágranna sína um aðstoð. Shivram sagðist ekki hafa haft efni á sómasamlegu náðhúsi. Hann þakkaði yfirvöldum í heimabæ sínum fyrir að aðstoða sig.

Rúmlega hálfur milljarður Indverja hefur ekki aðgang að náðhúsum og er vandamálið hvað verst á afskekktum svæðum landsins.

„Það er ekki eðlilegt að konur þurfi að sinna þörfum sínum utandyra," sagði Narre. „Þess vegna eiga öll heimili að hafa náðhús."