FBI gekk á milli bols og höfuðs á tölvuþrjótahópnum Lulzsec

Fimm af öflugustu meðlimum tölvuþrjótahópsins Lulzsec hafa verið handteknir og bandaríska alríkislögreglan FBI er á hælunum á fleirum úr hópnum.

Þessi tölvuþrjótahópur er alræmdur og mun vera í nánum tengslum við hina þekktu þrjóta í Anonymous. Lulzsec stóð að baki nokkrum tölvuárásum á síðasta ári sem vöktu heimsathygli. Sagt var að hópurinn hafi brjótist inn í gegnum öryggiskerfi Sony, Visa, Mastercard og Paypal greiðsluþjónustunnar á netinu.

Lítið hefur spurst til Lulzsec síðasta hálfa árið en svo virðist sem foringi hópsins hafi svikið félaga sína í hendurnar á FBI. Sá kallast Sabu og átti yfir höfði sér 124 ára fangelsisdóm.

Þeir sem fylgjast með netsamskiptum tölvuþrjóta segja að einhver klofningur sé kominn upp í röðum þeirra. Alla vega telji þeir sig illa svikna af eigin manni.

FBI er hinsvegar ánægt með handtökurnar. Talsmaður alríkislögreglunnar segir í samtali við Fox sjónvarpsstöðina að þarna hafi þeir náð að ganga á milli bols og höfuðs á Lulzsec.