Tími ungu strákanna

Miklar breytingar hafa orðið á leikmannahópi karlaliðs Selfoss sem féll úr efstu deild karla í sumar. Lykilmennirir Jón Daði Böðvarsson og Babacarr Sarr voru seldir til Noregs en auk þeirra hafa ellefu leikmenn kvarnast úr hópnum.

„Þetta eru miklar breytingar á mannskapnum á milli ára og kannski meiri en ég átti von á," segir Gunnar Guðmundsson, þjálfari liðsins. Gunnar, sem tók við liðinu í október, kveinkar sér þó ekki.

„Mér líst bara að mörgu leyti ágætlega á þetta. Auðvitað er stór hluti af liðinu farinn. Það mátti svo sem reikna með því eftir að liðið fór niður," segir Gunnar, sem átti þó ekki von á öðru en að Jón Daði og Babacarr Sarr héldu á vit nýrra ævintýra.

„Ég fagna því þegar menn í þessari stöðu taka næsta skref. Það var hagur allra enda hafði félagið eitthvað upp úr því," segir Gunnar, sem náð hefur frábærum árangri með landslið karla U17 ára undanfarin ár. Hann þekkir því vel að vinna með ungum leikmönnum.

„Það eru ungir strákar fyrir austan sem voru bæði hjá mér í landsliðinu og úrtakshópum svo ég þekki vel til þeirra. Þeir eru framtíðarleikmenn, engin spurning. Það er mikilvægt að fá þá inn," segir Gunnar, sem hefur tröllatrú á Selfyssingunum ungu.

„Á móti kemur að við setjum ekki alla ábyrgðina á þá þannig að við verðum að styrkja okkur og búa til gott og heilsteypt lið. Ungur strákarnir fá vissulega stærra hlutverk en þeir hafa haft hingað til."

Ljóst er að Einar Ottó Antonsson og markvörðurinn Jóhann Sigurðsson verða með Selfyssingum eftir ársfrí auk þess sem samið hefur verið við hollenska varnarmanninn Bernard Brons. Stefán Ragnar Guðlaugsson er samningslaus og stefnir á atvinnumennsku en leikur annars með liði í efstu deild. Sóknarmaðurinn Viðar Örn Kjartansson á ár eftir af samningi sínum en samkvæmt heimildum Fréttablaðsins hafa Selfyssingar í tvígang hafnað tilboðum Skagamanna í Viðar Örn.

„Hann á eitt ár eftir af samningi og því ljóst að lið sem vill fá hann þarf að greiða fyrir hann. Ég geri mér vonir um að hann verði áfram en, ef ekki, fáist góður peningur fyrir hann."

Þrettán farnir frá Selfossi

Jón Daði Böðvarsson, Viking

Babacarr Sarr, Start

Ólafur Karl Finsen, Stjarnan

Tómas Leifsson, án liðs

Dofri Snorrason, var í láni frá KR

Egill Jónssonvar, í láni frá KR

Hafþór Þrastarson, var í láni frá FH

Ismet Duracak, erlendis

Robert Sandnes, erlendis

Ivar Skjerve, erlendis

Endre Ove Brenne, erlendis

Jon André Röyrane, erlendis

Marko Hermo, erlendis