Anita orðinn leikmaður Newcastle

Enska úrvalsdeildarfélagið Newcastle United hefur gengið frá kaupum á hollenska landsliðsmanninum Vurnon Anita frá Ajax. Anita samdi við Newcastle til fimm ára.

Anita óskaði eftir félagaskiptum frá Ajax í júlí og hefur nú orðið að ósk sinni. Kaupverðið er talið vera 6,7 milljónir punda eða sem nemur tæpum 1,3 milljarði íslenskra króna.

„Við erum himinlifandi að fá að njóta þjónustu Vurnon," segir Alan Pardew knattspyrnustjóri Newcastle.

„Hann hefur farið í gegnum yngri flokka starf Ajax sem er þekkt fyrir að ala upp leikmenn á réttan hátt. Ég er handviss um að hann mun passa sem flís við rass við leikmannahóp okkar," segir Pardew.

Anita getur bæði spilað sem djúpur miðjumaður en einnig spilað í bakvarðarstöðunum.

Anita er fjórði leikmaðurinn sem gengur til liðs við Newcastle í sumar. Áður höfðu Romain Amalfitano, Curtis Good og Gael Bigirimana samið við félagið.