Hamfaraferðamenn flykkjast til New York og New Jersey

Svokallaðir hamfaraferðamenn flykkjast nú til New York og New Jersey íbúum þar til töluverðrar armæðu.

Þessir ferðamenn koma á hamfarasvæði eftir storma, eldgos eða jarðskjálfta til að sjá með eigin augum það sem þeir hafa þegar séð í fréttunum í sjónvarpinu.

Hreinsunarstarf stendur enn yfir í hluta af New York, New Jersey og Long Island en síðastnefndi staðurinn varð einna harðast úti á austurströnd Bandaríkjanna þegar ofsaveðrið Sandy skall þar á um síðustu mánaðarmót.

Sorpbílar, herbílar þjóðvarðliðsins og aurþaktir bílar borgarbúa sniglast um göturnar í bland við vel þrifna jeppa ferðamannanna sem komnir eru til að horfa á hús og byggingar sem Sandy skemmdi eða eyðilagði en þau eru mörg enn þakin þangi.

Þótt endurreisnarstarfinu miði mjög vel áfram enda dyggilega stutt af alríkisstjórninni má nefna að enn voru tugir þúsunda heimila á Long Island án rafmagns í gærdag.

Í frétt á fréttaveitunni AP um málið er rætt við nokkra af íbúum New York og New Jersey um þessa hamfaraferðamenn. Íbúarnir segja að þeim finnist óþægilegt að ferðamenn séu að skoða hörmungar þeirra en einn viðurkennir þó að sennilega myndi hann haga sér eins ef tækifæri gæfist til.