Bannað að safna yfirvaraskeggi

Breskum þrettán ára pilti hefur verið bannað að safna yfirvaraskeggi til styrktar átaki gegn krabbameini en skólinn, sem pilturinn sækir, segir að slíkt skegg sé ekki hluti af starfsemi skólans.

Í Bretlandi safna karlmenn yfirvaraskeggi í nóvember, til styrktar krabbameinsátaki - líkt og íslenskir karlmenn gera í mars (mottumars). Málið hefur vakið hörð viðbrögð í Bretlandi en skólinn stendur fast á sínu og segir meðal annars í rökstuðningi sínum að aðrir nemendur eigi ekki möguleika á að gera slíkt hið sama.

Gus Hook býr í bænum Dunstable í Bedfordskíri en hann byrjaði að raka sig þegar hann var níu ára gamall. Hann vildi taka þátt í átakinu eftir að afi hans sigraðist á krabbameini. „Af því að mér vex skegg, þá gerði ég ráð fyrir því að ég gæti safnað ágætri upphæð. Ég vildi sýna fólki mottuna mína, það vildu allir að ég tæki þátt í þessu," segir Hook við BBC.

Faðir hans segir að skólayfirvöld hafi meinað honum þetta því það þýddi að hann myndi líta öðruvísi út. Hann væri einn af örfáum sem yxi skegg og því ættu aðrir nemendur ekki möguleika á að gera það sama.