Ferðamenn munu geta keypt kannabis í Amsterdam

Borgaryfirvöld í Amsterdam munu ekki banna ferðamönnum að kaupa kannabis á kaffihúsum borgarinnar. Þetta tilkynnti Eberhard van der Laan, borgarstjóri í Amsterdam, í dag.

Nýleg lög sem ætlað var að stemma stigu við svokallaðri fíkniefnaferðamennsku áttu að taka gildi nú um áramótin. Ný skipuð ríkisstjórn Hollands ákvað á dögunum að breyta löggjöfinni svo að yfirvöld í hverju héraði fyrir sig gætu ákveðið hvort að útlendingar gætu keypt efnin.

Talið er að um ein og hálf milljón ferðamanna kaupi kannabis í Amsterdam árlega.

Borgarstjórinn sagði í dag að löggjöfin væri með öllu tilgangslaus. Ferðamennirnir myndu einfaldlega leita annað og í undirheimana ef þeim yrði meinað að kaupa kannabis í Amsteradam.