Læknar þurfa tæki úr dýragörðum fyrir of feitt fólk

Á sumum spítulum í Bretlandi þurfa læknar að nota tækjabúnað sem ætlaður eru stórvöxnum dýrum, á borð við ljón eða nautgripi, þegar þeir eru að meðhöndla offeita sjúklinga.

Margir spítalar hafa ekki haft fyrir því á liðnum árum að kaupa tæki sem hægt er að nota fyrir mjög íturvaxið fólk. Venjuleg tæki duga ekki fyrir allra feitasta fólkið. Því telja læknar að mikil þörf sé á að nota tæki sem ætluð eru stórum dýrum eins og ljónum, hestum, górillum og nautgripum þegar það þarf að senda fólk í segulómskoðun svo dæmi séu nefnd. Breska blaðið Daily Telegraph segir að sjúkrahús í Bandaríkjunum glími líka við þennan vanda og þar séu læknar í auknu mæli farnir að óska eftir því að fá tæki lánuð úr dýragörðum.

Telegraph segir að frá árinu 1993 hafi fjöldi offitusjúklinga þrefaldast í Bretlandi. Rannsókn sýnir að um helmingur spítala í Bretlandi hefur ekki tækjabúnað til að fást við offitusjúklingana. Auk segulómskoðunartækja og annarra slíkra tækja vanti oft hjólastóla fyrir offitusjúklinga og rúm sem eru nægjanlega stór. Þá vantar stundum klæðnað á feita fólkið.