Hvað varð um geimverurnar?

Breskir áhugamenn um fljúgandi furðuhluti hafa boðað til krísufundar. Svo virðist sem geimverur hafi misst allan áhuga á Bretlandseyjum. Verulega hefur dregið úr tilkynningum um framandi gesti.

„Útlit er fyrir að innan tíu ára þá muni þessi iðja heyra sögunni til," sagði Dave Wood, formaður ASSAP, samtök á sviði vísindalegra rannsókna á afbrigðilegum fyrirbærum.

Þrátt fyrir áratuga starfsemi hefur Wood og kollegum hans ekki tekist að færa sönnur á tilvist geimvera. Sú staðreynd, ásamt sífellt færri tilkynntum heimsóknum æðri lífvera, hefur leitt Wood til uppgjafar.

„Okkar fag byggir á líkindum," segir Wood. „Sá skortur sem nú er á haldbærum sönnunargögnum gefur til kynna að það sé í raun ekkert þarna úti."

Meðlimir ASSAP koma saman í næstu viku en þar verður ákveðið hvernig hægt sé að bregðast við þessari stöðu mála.

„Níutíu og átta prósent af öllum tilkynntum heimsóknum frá fljúgandi furðurhlutum er hægt að útskýra með einföldum hætti," segir Wood. „Og hvaða áhugamaður sem er myndi taka undir það."