Hitler skráður kjósandi í Bandaríkjunum

Í Bandaríkjunum þurfa menn að skrá sig hjá hinu opinbera til þess að mega kjósa. Alls kyns stofnanir og félagasamtök hafa tekið að sér að keyra um með skráningarlista til þess að fjölga kjósendum en nokkuð bar á því um helgina að furðunöfn væru skráð inn. Þannig var til dæmis einn Hitler skráður í Ohio núna um helgina.

Fox sjónvarpsstöðin segir þetta ekki vera neitt einsdæmi. Í kosningunum 2008 hafi til dæmis Mikki Mús og Andrés önd verið skráðir til leiks. Þá kom í ljós að stofnunin sem skilaði inn skráningarblöðunum hafði falsað fullt af nöfnum.