Sjúkradeildum lokað vegna rottugangs

Sýklafræðingar hafa verið kallaðir inn á Mansfield King´s Mill spítalann eftir að rottur fundust á spítalanum. Málið hefur orðið til þess að fresta þurfti nokkrum aðgerðum á spítalanum. Karen Thorlinson, yfirmaður á spítalanum, segir í samtali við Daily Mail að spítalinn sé stoltur af þjónustunni sem hann veitir og taki því málið grafalvarlega.

„Það var því mikið áfall fyrir okkur að komast að því að rottur hefðu komist inn á skurðstofurnar okkar að nóttu til, á tíma þar sem svæðið var ekki í notkun," segir Thorlinson.

Thorlinson segir að um leið og það hafi uppgötvast að rottur hefðu komist inn hefði strax verið gripið til ráðstafana til að þrífa svæðið og kalla til sérfræðinga til að sýklahreinsa.