Fyrstu tölur á miðnætti - allt í beinni á Vísi

Fylgst verður náið með forsetakosningunum í Bandaríkjunum hér á Vísi í allt kvöld og kosningasjónvarpi CNN streymt þar til niðurstöður verða skýrar undir morgun.

Barack Obama sitjandi forseti og Mitt Romney berjast harðri keppni um eitt valdamesta embætti heims og eru flestir sérfræðingar á því að Obama fari með sigur af hólmi.

Búist er við því að um hundrað og tuttugu milljónir manna mæti á kjörstað í dag. Kannanir á landsvísu benda til þess að kosningarnar verði afar spennandi en þó eru flestir sérfræðingar á því að staða Obama sé betri en Romney í flestum þeirra ríkja þar sem keppnin er hörðust.

Tölfræðingurinn Nate Silver skrifar til að mynda á vefsíðu sína hjá New York times í dag að samkvæmt hans gögnum líti út fyrir að Obama hafi heldur unnið á síðustu daga ef eitthvað er.

Í gær kom forsetinn fram á fjölmennum kosningafundum og naut aðstoðar stórstjarna eins og rapparans Jay-z og rokkarans Bruce Springsteen.

Um 30 milljónir hafa þegar kosið utan kjörfundar, í þeim ríkjum þar sem það er í boði og það gerði Obama sjálfur á dögunum og varð þá fyrsti sitjandi forsetinn til þess að kjósa utan kjörfundar.

Í dag hefur hann síðan tekið því rólega og hefur ekki komið fram á kosningafundum í eigin persónu í dag.

Romney ætlaði að gera slíkt hið sama en seint í gærkvöldi var ákveðið að hann myndi koma fram á nokkrum stöðum í lykilríkjum í dag. Hann flaug síðan til heimabæjar síns í Massachussets þar sem hann greiddi sitt atkvæði.

Kjörstöðum fer að loka á austurströnd Bandaríkjanna um miðnætti í kvöld að íslenskum tíma og möguleiki er á því að þá strax komi í ljós hvor hafi borið sigur úr býtum.