Romney enn á fullu - Obama spilar körfubolta

Forsetaframbjóðendurnir tveir, Barack Obama og Mitt Romney, eru nú að setja sig í stellingar fyrir kvöldið enda má búast við fyrstu tölum á miðnætti - á sama tíma og kjörstaðir loka.

Nú fyrir stundu kom Romney til Pittsburgh í Pennsylvaniu þar sem fjöldi fólks fagnaði honum en í dag hefur hann verið á ferð og flugi. Ekki er vitað hvað Romney ætlar að dvelja lengi í borginni.

Obama er hinsvegar mun slakari á því og hefur dvalið á hóteli í heimaborg sinni Chicago í allan dag. Nýjustu fréttir herma að hann sé farinn þaðan og sé núna í körfubolta á ónefndum stað.

Einkaþota Joe Biden, varaforseta lenti í Chicago fyrr í kvöld og er nú lagt við hlið Air Force One, forsetavélarinnar. Ekki er talið að hann fari í körfubolta með forsetanum.