Galli í kosningavélum - Velja Romney í stað Obama

Kjörstjórn Pennsylvaníuríkis hefur neyðst til að aftengja nokkrar kosningavélar eftir að kjósendur áttu í erfiðleikum með að greiða atkvæði.

Svo virðist sem að galli hafi komið upp í hugbúnaði kosningavélanna. Þannig lenti stuðningsmaður Barack Obama, Bandaríkjaforseta, í miklum vandræðum í kjörklefa. Vélin valdi ítrekað Mitt Romney, forsetaefni Repúblikanaflokksins, í stað Obama.

Kjósandinn náði myndbandi af atvikinu en það má sjá hér fyrir ofan.

Yfirkjörstjórn Pennsylvaníuríkis hefur staðfest þetta við fréttastofu NBC. Nokkrar kosningavélar hafa nú verið aftengdar.

Fregnir hafa borist af því að vélarnar hafi einnig skipt Romney út fyrir Obama.