Spenna í Flórída í upphafi talningar

Barack Obama er með 51% fylgi í Flórída, þegar búið er að telja um sextíu prósent atkvæða. Flórída er eitt af tíu lykilríkjunum sem gefur 29 kjörmenn. Fyrirfram var talið að Mitt Romney hefði yfirburði í ríkinu. Mitt Romney er með 49% atkvæða.

Guðmundur Árni Stefánsson, sendiherra Íslands í Bandaríkjunum, sagði í samtali við Vísi fyrr í kvöld að ómögulegt væri að spá fyrir um úrslitin. En ef Obama ynni Flórída þá væri staða hans mjög sterk.

„En ef það gerist, sem kemur fljótt upp úr kössunum, að Flórída falli með Obama þá er þetta eiginlega bara búið strax í byrjun talningar," sagði Guðmundur Árni. Hann lagði áherslu á það að Romney yrði að vinna Ohio og Flórída.