Valdaskiptin eru hafin í Kína

18. flokksþing Kommúnistaflokksins í Kína er hafið í Höll alþýðunnar í Bejing. Á þessu þingi verður skipt um flokksforystuna og mun Xi Jinping varaforseti landsins verða kosinn aðalritari flokksins en hann tekur við stöðunni af Hu Jintao.

Í upphafsræðu sinni á þinginu eyddi Jintao töluverðum tíma í að ræða um spillingu innan flokksins og varaði flokksmenn við því að hún gæti valdið hruni flokksins. Hann gat þess einnig að Kínverjar þyrftu að efla flota sinn og láta meira til sín taka á alþjóðavettvangi.

Þing þessi eru haldin á fimm ára fresti og sitja um 2.200 flokksmenn á þeim.