Rannsaka hve margir Skotar eru rauðhærðir

Rannsókn er hafin á því hve hátt hlutfall Skota er með erfðaefnið sem litar hár manna rautt. Einnig er vonast til þess að geta svarað spurningunni um afhverju Skotar eru sú þjóð heimsins þar sem rautt hár er algengast meðal manna.

Það er erfðafræðistofnunin ScotlandDNA sem stendur að baki þessari rannsókn en í náinni framtíð er vonast til þess að nú nái til allra íbúa á Bretlandseyjum.

Aðeins á milli 1% og 2% íbúa jarðarinnar hafa rautt hár en í Skotlandi er þetta hlutfall álitið vera um 13% af íbúum landsins. Vísindamenn hjá ScotlandDNA telja raunar að hlutfallið gæti verið enn hærra.

Þrátt fyrir útbreidda trú um að rautt hár sé að deyja út meðal mannkynsins er það ekki staðreyndin og í umfjöllun um málið á vefsíðu BBC segir að rauðhærðir muni líklega verða til staðar um ókomnar kynslóðir.

Alastair Moffat forstjóri ScotlandDNA segir að rannsóknin geti m.a. sýnt fram á afhverju fólk sem hvorugt er rauðhært fæðir rauðhærð börn. Það er raunar tilvikið í hans fjölskyldu. Hvorki hann né kona hans eru rauðhærð en það eru aftur á móti tvö af þremur börnum þeirra.