Morðinginn í Arizona í lífstíðarfangelsi

Jared Loughner, sem myrti sex og slasaði þrettán, þar á meðal þingkonuna Gabrielle Giffords, í janúar í fyrra, var dæmdur í lífstíðarfangelsi án möguleika á reynslulausn. Loughner er tuttugu og fjögurra ára gamall.

Dómarinn sagði við dómsuppkvaðninguna að Loughner ætti nú ekki möguleika á að taka up byssu og framkvæmda voðaverk sem þetta aftur. Hann var dæmdur í sjöfalt lífstíðarfangelsi, sex fyrir hvert fórnarlamb, og sjöunda fyrir árásina á Giffords. Þá var hann einnig dæmdur í 140 ára fangelsi.

Árásin átti sér stað í Tucson í Arizona 8. janúar í fyrra. Gabrielle Giffords er demókrati og átti sæti í fulltrúardeild Bandaríkjaþings. Auk þess átti hún sæti í mörgum þingnefndum, meðal annars hermála- og utanríkismálanefnd.

Hún sagði af sér þingsetu á þessu ári og í afsagnarbréfi sínu sagðist hún ætla að snúa aftur en um sinn væri hún ekki fær um að einbeita sér að fullu að starfinu.