Brasilísk glæpagengi hóta lögregluhundi lífláti

Glæpagengi í brasilísku borginni Rio de Janeiro hafa hótað fimm ára gömlum labrador lífláti. Fíkniefnahundurinn Boss hefur á síðustu misserum gert glæpasamtökum í borginni lífið leitt en lyktarskyn hans þykir með afbrigðum gott.

Þannig hafa glæpamennirnir tekið upp á því að fela fíkniefnin við illa lyktandi holræsi. Þrátt fyrir það hefur Boss ávallt haft upp á efnunum. Alls eru 68 fíkniefnahundar í lögregluliðinu í Rio, þó hefur enginn uppskorið jafn mikla reiði og Boss.

Á dögunum komust lögregluforingjar í Rio á snoðirnar um mögulegar hefndaraðgerðir gegn dýrinu. Engu að síður mun Boss halda skyldustörfum sínum áfram. Þá munu níu vaskir lögreglumenn gæta hans í sendiferðum í framtíðinni.

Vitor Valle, yfirmaður lögreglunnar í Rio, segir að þetta sé í fyrsta skipti sem fíkniefnahundi berst líflátshótun í borginni.