Sandy gæti hrakið rottur upp á yfirborðið

Íbúar New York gætu enn átt von á óþægindum eftir að fellibylurinn Sandy gekk yfir svæðið. Einhverjar líkur eru á því að rotturnar sem halda til í skólpræsum borgarinnar leiti upp á yfirborðið eftir að vatn flæddi um götur borgarinnar og niður í ræsi.

Holræsakerfi borgarinnar hefur fyllst af vatni og það gæti hrakið rottur af lífsvæði sínu og upp undir bert loft. Þetta kemur fram í fréttum CBS.

„Flestar munu rotturnar sem lifa þarna reyndar deyja," segir Herwig Leirs, meindýrafræðingur við Háskólann í Antwerp í Belgíu. Þó rotturnar geti synt eða flotið um í allt að fjóra daga mun straumurinn vinna gegn þeim og auk þess er líklegt að þær lokist í þröngum pípulögnum án súrefnis og deyi að mati Leirs.

Bæði Leirs og meindýrafræðingurinn Robert M. Corrigan sem vinnur hjá New York borg virðast telja ólíklegt að rotturnar komist í miklum mæli upp á yfirborðið. Það er þó ekki útilokað.