Terry hættur í enska landsliðinu

John Terry, fyrirliði Chelsea og fyrrum fyrirliði enska landsliðsins, sendi frá sér yfirlýsingu í kvöld þar sem hann tilkynnti að hann væri hættur að gefa kost á sér í enska landsliðið.

Terry er 31 árs gamall og hefur spilað 78 landsleiki síðan að hann lék sinn fyrsta leik 2003. Ástæða þess að Terry gefur ekki kost á sér lengur er að enska knattspyrnusambandið hefur ákært hann vegna kynþáttafordóma.

Terry þar að koma fyrir aganefnd enska sambandsins á morgun vegna ásakanna um kynþáttarníð gagnvart Anton Ferdinand leikmann Queens Park Rangers í leik Chelsea og QPR á síðustu leiktíð.

„Ég hef ákveðið að hætta að gefa kost á mér í landsliðið. Ég vil þakka þeim þjálfurum enska landsliðsins sem hafa valið mig í 78 landsleiki," sagði John Terry í yfirlýsingunni en hann er mjög ósáttur við að enska sambandið skuli halda áfram með málið þrátt fyrir að hann hafi verið sýknaður fyrir rétti í sumar.