Wenger: Áttum engra kosta völ nema að selja van Persie

Arsene Wenger, knattspyrnustjóri Arsenal, segir Lundúnarfélagið ekki hafa átt neinn kost í stöðunni nema að selja stjörnuframherja sinn Robin van Persie til Manchester United.

Tilkynnt var á heimasíðu United í gær að félögin hefðu komist að samkomulagi um kaupverðið sem talið er vera um 24 milljónir punda.

„Hann er hjá Manchester United, því miður fyrir okkur. Gengið var frá félagaskiptum síðdegis í dag," sagði Wenger í verkefni hjá frönsku sjónvarpsstöðinni TF1.

Van Persie er væntanlegur til Manchester fyrir hádegi í dag þar sem hann mun gangast undir læknisskoðun. Hann var með landsliði Hollands í gær sem tapaði 4-2 gegn Belgíu.

„Það er aldrei gott að missa leikmenn í hans gæðaflokki en þar sem hann átti aðeins ár eftir af samningi sínum áttum við engan annan kost í stöðunni," sagði Wenger.

Svo virðist sem Wenger hafi verið meðvitaður um brotthvarf Hollendingsins og undirbúið sig fyrir það með kaupum á leikmönnum.

„Við höfum þegar fengið Olivier Giroud og Lukas Podolski sem voru hugsaðir til þess að fylla í skarð van Persie," sagði Wenger.