Franskur sigur í úrhellinu í Donetsk

Frakkar unnu 2-0 sigur á Úkraínu í viðureign þjóðanna í D-riðli Evrópumótsins í knattspyrnu í dag. Tvö mörk Frakka með skömmu millibili í síðari hálfleik tryggðu þeim sigurinn.

Úrhelli og eldingar settu svip sinn á viðureign liðanna í Donetsk í dag. Vegna óveðursins þurfti að stöðva leik eftir fimm mínútur. Fór svo að leiknum var frestað um klukkustund.

Frakkar voru sterkari aðilinn í fyrri hálfleik og komust næst því að skora þegar Andriy Pyativ varði skalla Philippe Mexes með tilþrifum. Jeremy Menez fékk einnig dauðafæri en slakt skot hans af stuttu færi var varið af Pyativ.

Óskabarn úkraínsku þjóðarinnar, Andriy Shevchenko, fékk gott færi á hinum enda vallarins en skot hans fór beint á Hugo Lloris í franska markinu. Staðan markalaus í leikhléi.

Sókn Frakkanna hélt áfram í síðari hálfleik og bara árangur á 53. mínútu. Þá skoraði Menez með góðu skoti úr teignum sem hafnaði neðst í markhorninu.

Jafntefli hefði verið fín úrslit fyrir Úkraínu en draumurinn um stig úr leiknum varð að engu aðeins þremur mínútum síðar. Þá skoraði Yohan Cabaye, leikmaður Newcastle, með vinstri fótarskoti úr teignum.

Úkraínumenn reyndu hvað þeir gátu að rétt sinn hlut. Þeir komu sér nokkrum sinnum í álitlegar stöður en skot þeirra voru misheppnuð.

Frakkar eru eftir sigurinn í efsta sæti riðilsins með fjögur stig en Úkraína hefur þrjú stig í öðru sæti. England og Svíþjóð mætast í síðari leik kvöldsins í D-riðli en leikurinn hefst klukkan 19.



Fylgst er með gangi mála í leiknum í Boltavakt Vísis. Sjá hér.