Veiddi risaþorsk á sjóstöng í Noregi

Norskur sportveiðimaður veiddi risaþorsk um helgina. Hann reyndist vera 147 sentimetrar að lengd og tæp 42 kíló að þyngd og fékkst á stöng við Söröya nyrst í Noregi.

Í norskum og norrænum fjölmiðlum er talað um að þetta sé stærsti þorskur sem veiðst hefur við strendur Evrópu. Það er ekki rétt því vitað er um risaþorsk sem veiddist á línu á Miðnessjó hér við land árið 1941. Sá reyndist 181 sentimetri að lengd og um 60 kíló að þyngd.

Enn risavaxnari þorskar hafa svo veiðst við Nýfundnaland, þar á meðal sá stærsti í heiminum en hann var tveir metrar að lengd og 73 kíló að þyngd.