Leikstjóri Kony 2012 handtekinn

Jason Russell, leikstjóri heimildarmyndarinnar Kony 2012 og einn af stofnendum Invisible Children hjálparsamtakanna, var handtekinn í San Diego í gær. Samkvæmt lögregluyfirvöldum var Russell færður í varðhald vegna ölvunar, skemmdarverka og sjálfsfróunar á almannafæri.

Russell var handtekinn á gatnamótum í miðborg San Diego. Hann var einungis klæddur sundskýlu. Hann er sagður hafa farið úr sundskýlunni stuttu áður en lögregla var kölluð til.

Ben Keesey, stjórnarformaður Invisible Children, sagði að heilsu Russell hafi hrakað á síðustu vikum. Russell var lagður inn á sjúkrahús í kjölfar atviksins.

„Russell var lagður inn vegna ofþreytu og vannæringar," sagði Keesey. „Hann fær nú þá aðstoð sem hann þarfnast og honum mun batna. Síðustu vikur hafa reynt mjög á okkur."

Heimildarmyndin Kony 2012 var opinberuð fyrir rúmum tveimur vikum. Síðan þá hefur myndin fengið rúmlega hundrað milljón áhorf og er orðin að vinsælasta myndbandi í sögu internetsins.

Kony 2012 fjallar um voðarverk skæruliðaleiðtogans Joseph Kony. Framleiðendur myndarinnar vildu varpa ljósi á þær hörmungar sem Kony hefur valdið og vonast til þess að hann verði dreginn til saka í kjölfarið.

Hægt er að sjá Kony 2012 heimildarmyndina hér fyrir ofan.