Fíkniefnasjúklingum fækkar um helming í Portúgal

Fíkniefnasjúklingum hefur fækkað um yfir helming í Portúgal undanfarinn áratug.

Helsta ástæða þessa er talin sú að með lögum sem sett voru 2001 taldist það ekki lengur glæpur að hafa fíkniefni í fórum sínum í Portúgal og skipti þá ekki máli hvort um hass eða heróín væri að ræða.

Í frétt frönsku fréttastofunnar AFP um málið er haft eftir lækninum Joao Goulao að þessi löggjöf hafi greinilega dregið verulega úr fjölda þeirra Portúgala sem eiga við alvarleg fíkniefnavandamál að glíma.

Fram kemur í fréttinni að árið 2002 glímdu um 100.000 af íbúum Portúgal við alvarleg fíkniefnavandamál. Í dag er þessi fjöldi kominn niður í 40.000 manns og þeir fá flest allir viðeigandi meðferð við vanda sínum.

Þessi þróun hefur þar að auki leitt til þess að verulega hefur dregið úr glæpum tengdum fíkniefnaneyslu og mun færri sprautufíklar sýkjast en áður.

Ennfremur er bent á að hlutfallslega helmingi færri Portúgalir nota fíkniefni í dag en næstu nágrannar þeirra Spánverjar.