Mikil flóð í Ástralíu - þúsundir eru strandaglópar

Mörg þúsund íbúar í suðurhluta Ástralíu komast hvorki lönd né strönd vegna mikilla flóða þar í landi og hafa þúsundir neyðst til að yfirgefa heimili sín.

Herþyrlur sveima nú á milli svæða sem hafa orðið einna verst úti í austurhluta landsins til að aðstoða íbúa en þarlend yfirvöld telja að ástandið eigi eftir að versna og vara í nokkra daga, jafnvel vikur. Ellefuþúsund manns eru strandaglópar í Queensland-ríkinu einu og segja sjónarvottar að flóðin, sem eru af völdum mikilla rigninga, séu þau verstu í hálfa öld.

Ástandið er þó einna verst í bænum Moree í Nýja-suður-Wales en þar komast tíuþúsund manns hvorki lönd né strönd og er hálfur bærinn undir vatni. Margir hafa flúið upp á húsþök og bíða þess að verða bjargað en sjálfsbjargarviðleitnin er einnig sterk hjá dýrunum, þar á meðal eitruðum slöngum og snákum, sem leita á sömu staði og mannfólkið. Þetta veldur þeim sem bíða eftir björgun miklum ótta.