Tevez sektaður um sex vikna laun - verður ekki seldur á útsöluverði

Carlos Tevez, framherji Manchester City, var sektaður um sex vikna laun í desember fyrir að fljúga til heimalands síns, Argentínu, án leyfis. Talsmaður félagsins staðfesti þetta við Reuters-fréttastofuna.

Aganefnd félagsins sektaði Tevez þann 21. desember fyrir brot á samningi sínum við félagið. Tevez flaug án leyfis heim til Argentínu í nóvember og hefur ekki látið sjá sig á æfingu hjá Manchester liðinu síðan. Tevez áfrýjaði sektinni en áfrýjunarnefndin, sem samanstóð af stjórnarmönnum City, neitaði. Frestur Tevez til að áfrýja sektinni til ensku úrvalsdeildarinnar rennur út 30. janúar.

Argentínumaðurinn, sem hefur ekki spilað mínútu fyrir Manchester City síðan í september þegar hann neitaði að hita upp í leik með City í Meistaradeild Evrópu, er með um 200 þúsund pund í vikulaun eða sem nemur um 39 milljónum íslenskra króna. Sektin hljóðar því upp á um 235 milljónir íslenskra króna.

Verður ekki seldur á útsöluverði

Tevez hefur verið orðaður við brotthvarf frá City og hafa AC Milan, Inter Milan og Paris St Germain verið nefndir sem líklegir áfangastaðir. Khaldoon Al Mubarak, stjórnarformaður Manchester City, hefur staðfest að Tevez verði hvorki seldur ódýrt frá félaginu eða lánaður. Tevez verði látinn sitja út samning sinn við City ef til þess komi.

„Carlos er skuldbundinn Manchester City næstu tvö og hálft tímabil. Fáum við ekki sanngjarnt tilboð verður Tevez hér út samningstímann," sagði Mubarak.

Gagnrýnir forráðamenn AC Milan

Mubarak staðfestir að viðræður hafi átt sér stað við forráðamenn Inter Milan og PSG. Hann er hins vegar harðorður í garð forráðamanna AC Milan.

„Inter Milan og Paris St Germain hafa átt í góðum viðræðum við okkur og það er alltaf ánægjulegt að eiga í samskiptum við fólk sem nálgast hlutina af fagmennsku," sagði Mubarak sem segir ekki í myndinni að Tevez gangi til liðs við AC Milan. Hann segir að viðræður sem forráðamenn Milan áttu við Tevez og ráðgjafa hans án leyfis hafi orðið til þess að þeir nálguðust City á rangan hátt.

„Vilji þeir (forráðamenn Milan) eiga möguleika á að klófesta Tevez í félagaskiptaglugganum ættu þeir að hætta að hrósa hverjum öðrum og finna út úr hvernig þeir mæta kröfum okkar," sagði Mubarak.

City gengur vel án Tevez

Manchester City situr á toppi ensku úrvalsdeildarinnar og ekki er að sjá að félagið sakni Tevez sem varð markakóngur deildarinnar á síðustu leiktíð. Þrátt fyrir að Roberto Mancini, stjóri City, hafi lýst því yfir að Tevez myndi aldrei aftur spila fyrir félagið rétti hann Argentínumanninum sáttarhönd gegn því að hann bæðist afsökunar. Tevez stökk upp í næstu flugvél og hefur ekki sést síðan.