Jagielka um Fellaini: Við togum vanalega í hárið á honum á æfingum

Everton-maðurinn Phil Jagielka fagnaði flottum sigri á Manchester United með félögum sínum á Goodison Park í kvöld en það var Marouane Fellaini sem skoraði eina mark leiksins á 57. mínútu.

„Við vissum að þetta yrði mjög erfiður leikur á móti svona frábæru liði eins og Manchester United. Stóri strákurinn var með hausinn á réttum stað og við uppskárum þrjú stig," sagði Phil Jagielka eftir leikinn.

„Það er nánast ómögulegt að dekka Fellaini. Við togum vanalega í hárið á honum á æfingum en það má víst ekki í leikjum," sagði Jagielka léttur.

„Það eru allir frekar þreyttir eftir þennan leik en það er gaman að senda stuðningsmennina heim með sigur eftir fyrsta leikinn á tímabilinu. Það er betra en við gerum vanalega," sagði Jagielka.