Mögulegt að barnaníðingurinn sé þingmaður

Þingmaður breska Verkamannaflokksins segir að ef íhaldsmaðurinn sem sakaður er um að hafa misnotað börn á barnaheimili í Wales á áttunda og níunda áratug síðustu aldar er þingmaður, þá eigi hann samstundis að víkja af þingi.

Greint hefur verið frá því undanfarna daga að maður sem sakaður er um að hafa beitt börn á barnaheimili í Wales ofbeldi sé háttsettur félagi í Íhaldsflokknum. Maðurinn mun hafa misnotað börnin með því að taka þau af heimilinu og selja þau í vændi á nálægu hóteli. David Cameron, forsætisráðherra Breta og formaður Íhaldsflokksins, hefur sagt að það sé nauðsynlegt að bregðast hart við þessum ásökunum og Theresa May, innanríkisráðherra í stjórn hans, svaraði fyrir málið í þinginu í gær.

Susan Jones, þingmaður Verkamannaflokksins, sagði í þeim umræðum að ríkisstjórnin yrði að bregðast hart við ef það kæmi í ljós að hinn grunaði væri þingmaður í lávarðadeildinni. Innanríkisráðherrann svaraði því til að ef grunur félli á nokkurn aðila, til dæmis ef hann yrði ákærður, þá yrði tekin ákvörðun um framtíð hans þegar sú atburðarrás færi af stað.

Talið er að rannsókn sem fór fram fyrir nokkrum árum á misnotkuninni á barnaheimilinu hafi verið í skötulíki. Innanríkisráðherrann lýsti því í breska þinginu í gær hvaða leið yrði farin að þessu sinni til að rannsaka málið í þaula.