Daily Mail fullyrðir að De Gea fari til United

Enska dagblaðið Daily Mail fullyrðir á vefsíðu sinni í kvöld að Manchester United hafi komist að samkomulagi við Atletico Madrid um kaup á markverðinum David De Gea fyrir 17,8 milljónir punda. De Gea er tvítugur og mun samkvæmt fréttinni skrifa undir fimm ára samning við United.

Forráðamenn Atletico sögðu fyrr í vikunni að þeir hefðu fengið tilboð bæði frá United og Chelsea en að De Gea sjálfur þyrfti að ákveða næsta skref á sínum ferli. De Gea sagði síðast í dag ekkert hafa heyrt af áhuga annarra liða og að ekkert mark væri takandi á þessum sögusögnum.

Margir markverðir hafa verið orðaðir við United að undanförnu enda mun Edwin van der Sar leggja skóna á hilluna í lok tímabilsins.

Daily Mail fullyrðir að Alex Ferguson, stjóri United, hafi sett De Gea efstan á sinn óskalista í síðasta mánuði og að nú sé búið að komast að samkomulagi um kaupverð.

Aðrir sem eru helst orðaðir við United eru Manuel Neuer, Julio Cesar og Maarten Stekelenburg.