Ferguson: „Þetta mál er ekki til umræðu – Guði sé lof“

Rafael Da Silva hægri bakvörður Manchester United fékk rautt spjald í leiknum gegn Tottenham í ensku úrvalsdeildinni á sunnudag og hefur enska knattspyrnusambandið tekið hegðun hans fyrir í aganefnd.

Rafael var ekki sáttur við ákvörðun dómarans Mike Dean þegar hann fékk sitt annað gula spjald um miðjan síðari hálfleik. Látbragðið sem fylgdi í kjölfarið var vel skiljanlegt í öllum heimshornum og enska knattspyrnusambandið er með málið til skoðunar.

Forráðamenn Man Utd þurfa að gera grein fyrir hegðun leikmannsins en málið verður tekið fyrir á fimmtudag og gæti Rafael fengið leikbann og sekt. Alex Ferguson hefur ekki farið leynt með þá skoðun sína að Mike Dean er ekki besti dómari Bretlandseyja og eftir leikinn gegn Tottenham sagði Ferguson: „Það er ekki þess virði að ræða þetta atvik - það geta allir séð hvað gerðist. Þetta mál er ekki til umræðu hjá mér - Guði sé lof," sagði Ferguson.