Birmingham er hætt við að kaupa Robbie Keane

Enska úrvalsdeildarliðið Birmingham hefur hætt við að kaupa írska landsliðsmanninn Robbie Keane frá Tottenham en Tottenham var búið að samþykkja sex milljón punda tilboð Birmingham í framherjann.

Niðurstaða fundar í dag, hjá stjórananum Alex McLeish, stjórnarformanninum Peter Pannu og yfirnjósnaranum Paul Montgomery, var að það væri peningalega ekki besti kosturinn í stöðunni að kaupa Keane.

Keane hefur aðeins tekið þátt í þrettán leikjum hjá Tottenham í vetur og hefur komið inn á sem varamaður í ellefu þeirra. Keane hefur ekki fengið mörg tækifæri síðan Harry Redknapp tók við Tottenham-liðinu en hann var lánaður til Celtic í fyrra.

Birmingham þarf nauðsynlega meiri ógn í sóknina en aðeins Wigan hefur skorað færri mörk í ensku úrvalsdeildinni í vetur og markahæsti leikmaður liðsins er miðjumaðurinn Craig Gardner með fimm mörk. Framherjarnir Nikola Zigic, Kevin Phillips og Cameron Jerome hafa aðeins skorað átta mörk saman.