Konchesky og Poulsen eiga báðir möguleika hjá Kenny Dalglish

Kenny Dalglish, stjóri Liverpool, segist eiga mikið verk fyrir höndum í að reyna að byggja upp sjálfstraust og orðspor margra af reyndari leikmanna liðsins. Hann nefndi sérstaklega bakvörðinn Paul Konchesky og danska miðjumanninn Christian Poulsen en Roy Hodgson keypti þá báða til liðsins.

Paul Konchesky og Christian Poulsen hafa ekki átt upp á pallborðið hjá stuðningsmönnum Liverpool og flestir bjuggust við því að nýi stjórinn, Kenny Dalglish, myndi reyna að losa sig við þá. Svo verður þó ekki því Dalglish ætlar sér að reyna að koma þeim báðum í gang.

Roy Hodgson keypti Konchesky frá Fulham og Christian Poulsen kom frá Juventus. Þeir voru ekki með í jafnteflinu við Everton í gær og Konchesky hefur ekki enn fengið að spila fyrir Dalglish.

„Við erum með nokkra eldri leikmenn sem stuðningsmennirnir hafa ekki tekið vel. Við verðum að reyna að byggja þá upp. Ef við getum fengið þá Christian Poulsen og Paul Konchesky til baka þá erum við með mun breiðari hóp. Christian spilaði vel á móti Blackpool og Paul mun líka fá sitt tækifæri," sagði Kenny Dalglish en notaði engu að síður Glen Johnson sem vinstri bakvörð á móti Everton þótt að bæði Konchesky og Fábio Aurélio væru heilir.

„Við viljum alltaf hafa bestu mennina okkar inn á vellinum," svaraði Dalglish aðspurður út í þá ákvörðun sína. Dalglish sá annars marga jákvæða hluti í Everton-leiknum og segir liðið vera á réttri leið.