Redknapp: Við höfum ekki efni á Andy Carroll

Harry Redknapp, stjóri Tottenham, segir engar líkur á því að Tottenham kaupi Andy Carroll, framherja Newcastle, eins og hefur verið orðrómur um í ensku blöðunum. Carroll er núbúinn að framlengja við sitt æskufélag en ensku blöðin keppast engu að síður um að velta sér upp úr hugsanlegum kaupendum á þessum stóra og sterka framherja.

Andy Carroll gæti verið falur fyrir 30 milljónir punda en það eru ekki mörg ensk félög sem gæti borgað slíka upphæð. Redknapp segir að Tottenham sé ekki eitt af þeim.

„Hann er góður leikmaður sem lætur hvaða varnarmann sem er hafa fyrir hlutunum. Þetta er leikmaður sem ég vildi hafa í mínu liði," sagði Harry Redknapp en bætti við:

„Við eigum samt enga möguleika á því að krækja í hnan. Hvað kostar hann mikið? Við erum að tala um 30 til 40 milljónir punda hérna," sagði Redknapp.

Andy Carroll hefur skorað 11 mörk í 19 deildarleikjum á sínu fyrsta tímabili í ensku úrvalsdeildinni auk þess að gefa 7 stoðsendingar á félaga sína en hann er nýorðinn 22 ára gamall og er líklegur framtíðarframherji enska landsliðsins.