Eru PSV Eindhoven og Ajax að slást um Eið Smára?

Enska blaðið The Mirror segir frá því í morgun að hollensku liðin PSV Eindhoven og Ajax séu fremst í flokki í kapphlaupinu um að fá Eið Smára Guðjohnsen til sín en Stoke er tilbúið að selja íslenska framherjann í þessum félagsskiptaglugga.

Eiður Smári hefur ekki komið við sögu hjá Stoke síðan í deildarbikarleik í lok október en hann hefur ekki verið í hópnum hjá Tony Pulis í undanförnum leikjum. Eiður Smári var orðaður við Fulham og Swansea þegar glugginn opnaði en ekkert hefur gerst í hans málum undanfarna daga.

Eiður Smári hefur ekki verið með fast sæti í byrjunarliði sinna liða undanfarin ár og síðustu félagsskipti hans hafa ekki gengið upp. Hann fann sig ekki í franska boltanum með Mónakó og hefur nánast ekkert fengið að spila hjá Pulis, stjóra Stoke.

Tony Pulis hefur lítið viljað tjá sig um framtíð Eiðs Smára en það sem er ljóst er að þeir Ricardo Fuller, Kenwyne Jones, Tuncay og Jon Walters eru langt á undan Eið Smára í goggunarröðinni.