Pútín vill stofna Evrasíubandalag

Vladimír Pútín, forsætisráðherra Rússlands, lagði til í blaðagrein í gær að stofnað yrði nýtt Evrasíusamband, bandalag fyrrverandi Sovétlýðvelda sem gæti keppt við Evrópusambandið, Bandaríkin og Asíuríki á alþjóðavettvangi.

Fátt virðist geta komið í veg fyrir að Pútín verði á ný forseti Rússlands á næsta ári, nú þegar Dmitrí Medvedev hefur lýst því yfir að hann muni ekki bjóða sig fram gegn honum.

Blaðagreinin, sem birt var í dagblaðinu Izvestia í gær, er fyrsta meiriháttar yfirlýsing Pútíns frá því ljóst varð að hann myndi sækjast eftir forsetaembættinu. Óhætt er að gera ráð fyrir að hann muni leggja áherslu á að þessi hugmynd um bandalag Evrasíuríkja verði að veruleika.

Pútín hefur sagt hrun Sovétríkjanna árið 1991 hafa verið mestu heimspólitísku ófarir 20. aldarinnar en neitar því að vilja endurvekja þau.

„Það er ekki verið að tala um að endurreisa Sovétríkin í neinum skilningi,“ sagði hann. „Það væri einfeldningsháttur að reyna að endurvekja eða líkja eftir einhverju sem tilheyrir fortíðinni, en náin samlögun byggð á nýjum gildum og efnahagslegum og stjórnmálalegum grunni er krafa samtímans.“

Rússland hefur nú þegar gengið í viðskiptabandalag með Hvíta-Rússlandi og Kasakstan. Tollmúrar milli þessara þriggja ríkja hafa verið felldir niður og um áramótin taka gildi sameiginlegar markaðsreglur í þeim öllum.

Pútín segir að Kirgisistan og Tadsjikistan muni brátt ganga til liðs við þetta bandalag.

„Við ætlum ekki að láta þar staðar numið heldur setja fram metnaðarfull áform um nýtt samstarf á æðra plani í Evrasíusambandinu,“ segir Pútín í grein sinni. „Ásamt öðrum lykilgerendum og svæðabandalögum, eins og Evrópusambandinu, Bandaríkjunum, Kína og Efnahagsbandalagi Asíu- og Kyrrahafsríkja á það að tryggja stöðugleika í alþjóðaþróun.“

Rússar hafa lengi lagt mikla áherslu á nánari samvinnu milli fyrrverandi Sovétlýðvelda en fyrri tilraunir í þá veru hafa strandað á hagsmunaárekstrum þeirra. Sum þessara fyrrverandi Sovétlýðvelda tortryggja rússnesk stjórnvöld og hafa því frekar horft til vesturs og leitað eftir samstarfi við Evrópusambandið og jafnvel Atlantshafsbandalagið.

gudsteinn@frettabladid.is