Google vandamál Rick Santorum

Rick Santorum, einn af hugsanlegum forsetaframbjóðendum í Bandaríkjunum, á við heldur óheppilegt vandamál að stríða.

Santorum er íhaldssamur Repúblikani og segist leggja áherslu á kristileg gildi. Í gegnum tíðina hefur Santorum lýst yfir skoðunum sínum á samkynhneigð sem fallið hafa í grýttan jarðveg hjá baráttuhópum. Einn slíkur baráttumaður, dálkahöfundurinn Dan Savange, tók ummæli Santorum nærri sér.

Savage hefur í áraraðir barist gegn einelti og útskúfun ungs samkynhneigðs fólks. Þegar hann heyrði ummæli Santorum um að samkynhneigð væri skaðleg samfélaginu ákvað Savage að taka málin í sínar hendur og skipulagði herferð gegn Repúblikanum. Herferðin fólst í því að nefna heldur ógeðfelldan vökva í höfuðið á Santorum. Þegar nafn Santorum er slegið inn í leitarvél Google birtist skilgreiningin efst á síðunni.

Santorum segir sig nú vera lagðan í stafrænt einelti og hefur beðið Savage um að fjarlæga skilgreininguna af netinu.