Drukknir hringdu kirkjuklukkum

Þeir voru ekkert að fara dult með það piltarnir sem brutust inn í hina 800 ára gömlu Vangen kirkju í Aurlandsvangen í Noregi í fyrrinótt. Þeir kneifuðu vín, spiluðu á orgelið og hringdu svo kirkjuklukkunum klukkan fjögur um nóttina. Þeir unnu ekki nein skemmdarverk á kirkjunni en stálu hinsvegar skrúða prestsins. Kirkjuvörðurinn segir í samtali við Sogn Avis að þjófavarnakerfi kirkjunnar hafi verið bilað.

Þótt prestsskrúðanum hafi verið stolið var það þó ekki messuvínið sem kónarnir kneifuðu. Á orgelinu stóð flaska af Chablis 2007. Norska lögreglan var ekki lengi að hafa upp á hinum óboðnu kirkjugestum. Það voru tveir þekktir gleðipinnar um tvítugt sem voru heldur skömmustulegir þegar laganna verðir bönkuðu upp hjá þeim. Þeir skiluðu strax prestsskrúðanum, sem var snyrtilega samanbrotinn.