Darren Bent tryggði Aston Villa sigur á Manchester City

Darren Bent byrjaði frábærlega með Aston Villa því hann tryggði liðinu 1-0 sigur á Manchester City í kvöld í sínum fyrsta leik með Villa síðan félagið keypti hann á 24 milljónir punda frá Sunderland.

Manchester City er því í þriðja sæti ensku úrvalsdeildarinnar eftir leiki dagsins og missti Arsenal því upp fyrir sig. Aston Villa fékk hinsvegar mikilvæg stig í fallbaráttunni.

Manchester City-liðið komst lítið áleiðis gegn frábærri vörn heimamanna sem voru aðeins að vinna sinn annan leik í ellefu leikjum eða frá því í að þeir unnu Blackpool 10. nóvember.

Darren Bent skoraði einnig í sínum fyrsta leik með Sunderland og Charlton. Sigurmarkið kom á 18. mínútu þegar hann fylgdi á eftir skoti Ashley Young sem Joe Hart varði út í teiginn. Bent var á réttum stað og skoraði af yfirvegun.