Viðbjóðsleg hegðun hjá Diouf

El-Hadji Diouf, leikmaður Blackburn, varð sér enn eina ferðina til skammar um helgina er Blackburn mætti QPR í bikarkeppninni.

Félagi Diouf, Gael Givet, afrekaði í leiknum að tvífótbrjóta Jamie Mackie, leikmann QPR.

Þegar Mackie lá sárkvalinn á vellinum kom Diouf til hans og jós yfir hann fúkyrðunum.

"Ég ligg þarna stórslasaður og meira að segja félagar hans skömmuðust sín yfir því hvað hann lét út úr sér," sagði Mackie.

"Það er meira að segja erfitt að hafa eftir sumt af því sem hann sagði. Hann sagði að ég væri til skammar. Svo hann "fuck you and fuck your leg," sagði Mackie en þessar setningar þarf vart að þýða fyrir vel gefna lesendur Vísis.

"Það er ekkert pláss fyrir svona menn í boltanum. Þessi maður er algjörlega til skammar fyrir íþróttina. Ég reyni að hugsa sem minnst um Diouf því þegar ég geri það langar mig að rífa af mér gifsið, hlaupa af stað og finna hann.

"Það er viðbjóðslegt að haga sér svona. Það þarf að láta fólk vita af svona töppum."