Babel fékk bara sekt fyrir twitter-myndina af Howard Webb

Ryan Babel, leikmaður Liverpool, var í dag dæmdur til þess að greiða tíu þúsund punda sekt fyrir að seta mynd af dómaranum Howard Webb í Manchester United búning eftir bikartap Liverpool á Old Trafford. Þetta gerir um 1,8 milljón íslenskra króna.

Babel gerði ekki athugasemd við kæru enska knattspyrnusambandsins á hendur honum og hann hafði líka beðist afsökunar á hegðun sinni fljótlega eftir að málið komst í hámæli í enskum fjölmiðlum.

Babel átti á hættu að vera dæmdur í leikbann en hann fékk að segja sína hlið á málinu í dag og slapp við bann. Hann er fyrsti leikmaðurinn sem fer fyrir aganefnd enska sambandsins fyrir eitthvað sem viðkomandi setur inn á samskiptasíðu.

Enska sambandið gaf einnig frá sér yfirlýsingu að þeirra mat á samskiptasíðum eins og Facebook og twitter er að þær séu undir sama hatti og hinir venjubundnu fjölmiðlar.