Redknapp: Beckham vill koma til Tottenham

Harry Redknapp, stjóri Tottenham, segir að David Beckham vilji koma til Tottenham á láni og spila næstu næstu mánuðina á White Hart Lane. Redknapp segir líka að það sé mikil þörf á leikmanni í hans stöðu í sínu liði.

Beckham ákvað það víst yfir jólin að hann vildi koma aftur til Evrópu og þá helst spila í ensku úrvalsdeildinni. Sir Alex Ferguson, stjóri Manchester United, vildi ekki fá hann til United en Redknapp tekur honum fagnandi.

„Hann sagði mér að hann vilji koma og spila með Tottenham. Við verðum samt að vera fljótir að klára þetta mál," sagði Harry Redknapp en Darren Eales, yfirmaður knattspyrnumála hjá Tottenham mun fara til Los Angeles og reyna að semja við Galaxy -liðið.

„Ég er búinn að láta þetta í hendurnar á starfsmönnum félagsins. Þeir eru að tala við þá sem ráða þessu hjá Galaxy," sagði Redknapp og hann segir pláss fyrir Beckham í Spurs-liðinu.

„Aaron Lennon er eini hægri vængmaðurinn okkar. David Bentley er alltaf að meiðast og nú síðast á föstudaginn. Þetta er borðleggjandi," sagði Redknapp.

„Þegar ég fékk Teddy Sheringham til Portsmouth þá sagði ég við strákana. Horfið á hann, hann gerir allt hundrað prósent rétt. Ég held að Beckham verði eins. Hann er oft klukkutíma lengur eftir æfingar og fyrir unga leikmenn að sjá slíkt er betra en allir þjálfarar í heimi," sagði Redknapp.