Malaría er á hægu undanhaldi í heiminum

Umtalsverður árangur hefur náðst í baráttunni gegn malaríu á síðustu árum, að því er fram kemur í nýrri skýrslu frá Alþjóðaheilbrigðisstofnuninni (WHO).

Samkvæmt skýrslunni veiktust 225 milljón manns af malaríu árið 2009. Sama ár dró sjúkdómurinn 781 þúsund til dauða. Þótt þetta séu háar tölur hefur ástandið batnað töluvert frá árinu 2000, þegar 233 milljónir manna veiktust og 895 þúsund létu lífið af völdum malaríu. Þennan áratug hefur dauðsföllum því fækkað um 20 prósent. Verst er ástandið meðal barna í Afríkuríkjum, þar sem eitt barn deyr af völdum malaríu á 45 sekúndna fresti.

Malaría herjar nú á íbúa í 108 löndum en fari svo sem horfir mun takast að útrýma henni úr átta til tíu löndum fyrir árið 2016. Síðan 2007 hefur henni verið útrýmt í þremur löndum: Marokkó, Túrkmenistan og Armeníu. Stofnunin þakkar þennan árangur því að fjárframlög til baráttunnar gegn malaríu hafa aldrei verið hærri. Árið 2009 námu þau 1,5 milljörðum Bandaríkjadala og árið 2010 voru þau komin upp í 1,8 milljarða dala.- gb